Home வவுனியா செய்திகள் வவுனியாவில் நேற்று இரவு ஹெரோயின் போதைப் பொருளுடன் நபர் ஒருவர் கைது!

வவுனியாவில் நேற்று இரவு ஹெரோயின் போதைப் பொருளுடன் நபர் ஒருவர் கைது!

வவுனியா பண்டாரிகுளம் பகுதியில் நேற்று இரவு ஹெரோயின் போதைப் பொருளுடன் நபர் ஒருவரைக் கைது செய்துள்ள பொலிசார் அவரிடம் மேற்கொள்ளப்பட்ட விசாரணைகளின்போது கடந்த மாதம் கேரள கஞ்சாவுடன் கைது செய்யப்பட்டு நீதிமன்றத் தண்டனை பெற்றுள்ளார் என்பது பொலிசாருக்குத் தெரியவந்துள்ளது.

வன்னிப் பிராந்திய பிரதிப் பொலிஸ்மா அதிபர் அனுர அபேயவிக்கிரம தலைமையின் கீழ் செயற்படும் போதை ஒழிப்புப் பிரிவு பொலிசார் நேற்று இரவு பண்டாரிகுளம் பகுதியில் சென்ற நபர் ஒருவரை சோதனைக்குட்படுத்தியபோது அவரது உடமையிலிருந்து ஒரு கிராம் 240 மில்லிக்கிராம் ஹெரோயின் போதைப் பொருளை மீட்டுள்ளனர்.

குறித்த நபர் பண்டாரிக்குளம் பகுதியிலுள்ள பாடசாலைக்கு முன்பாக உள்ள வியாபார நிலையத்தில் வைத்து கடந்த மாதம் கேரள கஞ்சா பொதியுடன் கைது செய்யப்பட்டு நீதிமன்றத் தண்டனை பெற்றுள்ளார் என்பது பொலிசாரின் விசாரணைகளின்போது தெரியவந்துள்ளது.

நேற்றைய தினம் ஹெரோயின் போதைப் பொருளுடன் கைது செய்யப்பட்ட குறித்த நபர் பொலிஸ் நிலையத்தில் தடுத்துவைக்கப்பட்டு விசாரணைகள் மேற்கொள்ளப்பட்டு வருவதாகவும் இன்றைய தினம் நீதிமன்றத்தில் முற்படுத்த நடவடிக்கை மேற்கொள்ளப்பட்டு வருவதாகவும் பொலிசார் மேலும் தெரிவித்துள்ளனர்.