பிரித்தானியாவில் கண்ணில் பட்ட மக்களை சரமாரியாக குத்திய கொன்ற கொடூரன்!

பிரித்தானியாவில் பூங்கா ஒன்றில் மர்ம நபர் மக்கள் மீது சரமாரியாக கத்தியால் குத்தியதால், 3 பேர் பலியான நிலையில், இதை பொலிசார் பயங்கரவாத சம்பவமாக அறிவித்துள்ளனர்.

பிரித்தானியாவின் தென்கிழக்கில் உள்ள ரீடிங் நகரில் நேற்று இரவு உள்ளூர் நேரப்படி 7 மணியளவில் பூங்காவிற்குள் புகுந்த மர்ம நபர் கண்ணில்பட்ட மக்களைச் சரமாரியாகக் கத்தியால் குத்தியதில் 3 பேர் உயிரிழந்துள்ளனர். பலர் காயமடைந்துள்ளனர்.

இந்தத் தாக்குதல் தீவிரவாதச் செயலோடு தொடர்புடையதா என்பது குறித்து பொலிசார் விசாரணை மேற்கொண்டு வந்த நிலையில், இதை பயங்கரவாத சம்பவமாக அறிவித்துள்ளனர்.


மேலும், இந்தத் தாக்குதலில் ஈடுபட்ட 25 வயதுடைய நபரை பொலிசார் கைது செய்துள்ளனர். அவர் லிபியா நாட்டைச் சேர்ந்தவர் என்பது விசாரணையில் தெரியவந்தது.

ரீடிங் நகரில் உள்ள போர்பரி பூங்காவில் நேற்று மாலை வழக்கம் போல் மக்கள் கூடியிருந்தனர். அப்போது, கூட்டத்துக்குள் புகுந்த 25 வயது மதிக்கத்தக்க இளைஞர் ஒருவர் திடீரென சத்தமிட்டு, தான் வைத்திருந்த கத்தியால் கண்ணில் தென்பட்ட மக்கள் மீது குத்தத் தொடங்கினார்.

இதில் பூங்காவில் இருந்த பலர் கத்திக்குத்து வாங்கிய நிலையில் மயங்கிச் சரிந்தனர். பலர் இந்த சம்பவத்தைப் பார்த்து அதிர்ச்சியடைந்து அங்கிருந்து அலறியடித்துக்கொண்டு ஓடினர்.

இந்த சம்பவம் குறித்து உடனடியாக பொலிசாருக்கு தெரிவிக்கப்பட்டதால், பொலிசார் அங்கு விரைந்து வந்த போது, சம்பவ இடத்தில் 3 பேர் பலியாகி கிடந்ததைக் கண்டுள்ளனர். இதில் பலர் காயமடைந்துள்ளதால், அவர்களை மருத்துவமனைக்கு அனுப்பி வைத்துள்ளனர்.


இந்தச் சம்பவத்தை நேரில் பார்த்த இளைஞர் லாரன்ஸ் வோர்ட் என்பவர் கூறுகையில், நான் என் நண்பர்களுடன் பூங்காவில் அமர்ந்து பேசிக்கொண்டிருந்தேன். பலரும் பூங்காவில் சாப்பிட்டுக்கொண்டும், ஏதோ குடித்துக்கொண்டும் இருந்தார்கள்.


அப்போது ஒரு இளைஞர் திடீரென கூட்டத்துக்குள் வந்து புரியாத மொழியில் ஏதோ பேசி அனைவரின் கவனத்தை ஈர்த்தார். திடீரென தான் வைத்திருந்த கத்தியால் தன் அருகில் இருந்தவர்கள் மீது குத்தத் தொடங்கியதால் நாங்கள் அங்கிருந்து தப்பித்து ஓடினோம் என்று கூறியுள்ளார்.

தேம்ஸ் வேலி பொலிசின் புலனாய்வுப் பிரிவின் கண்காணிப்பாளர் இயான் ஹன்டர் கூறுகையில், இந்தத் தாக்குதலில் ஒரு இளைஞரைத் தவிர வேறு யாருக்கும் தொடர்பு இருப்பதாகத் தெரியவில்லை. இதை தீவிரவாதச் செயலோடு தொடர்புபடுத்தி இப்போது பார்க்க முடியாது. பலரும் அவ்வாறு சந்தேகித்தாலும், விசாரணையில்தான் தெரியவரும்.


இந்தத் தாக்கதலுக்கான காரணம் குறித்து கைதான அந்த இளைஞரிடம் விசாரித்து வருகிறோம். இந்தத் தாக்குதல் குறித்த புகைப்படம், வீடியோ ஏதும் மக்களிடம் இருந்தால் அதை வெளியிட வேண்டாம். பாதிக்கப்பட்டவர்கள் நலன் கருதி இதைச் சொல்கிறோம்.

மக்கள் பூங்காவுக்குள் செல்ல வேண்டாம் எனக் கேட்டுக்கொள்கிறோம். இந்தத் தாக்குதலுக்கும் கறுப்பினத்தவர்கள் மீதான இனவெறித் தாக்குதலுக்கும் எந்தத் தொடர்பும் இல்லை என்று கூறியிருந்தார்.

தற்போது, மூன்று பேர் கத்தியால் குத்தப்பட்டு உயிரிழந்ததை பயங்கரவாத சம்பவமாக, இப்போது அதிகாரப்பூர்வமாக பயங்கரவாத சம்பவமாக தேம்ஸ் பள்ளத்தாக்கு பொலிசார் தெரிவித்துள்ளனர்.


தேம்ஸ் பள்ளத்தாக்கு காவல்துறை வெளியிட்டுள்ள அறிக்கையில், நேற்றிரவு நடந்த தாக்குதல் சம்பவம் இப்போது பயங்கரவாத சம்பவமாக அறிவிக்கப்பட்டுள்ளது என்பதை பயங்கரவாத தடுப்பு பொலிஸால் உறுதிப்படுத்த முடியும்.

பயங்கரவாத தடுப்பு பொலிஸ் தென்கிழக்கு (சி.டி.பி.எஸ்.இ) அதிகாரிகள் இரவு முழுவதும் தேம்ஸ் பள்ளத்தாக்கு காவல்துறையின் முக்கிய குற்றத் துறையுடன் நெருக்கமாக பணியாற்றி வருவதாக தெரிவிக்கப்பட்டுள்ளது.


மேலும், பிரதமர் போரிஸ் ஜோன்சன், நேற்று இந்த சம்பவம் குறித்து, ரீடிங் நகரில் கத்திக்குத்து தாக்குதலில் உயிரிழந்தவர்களுக்கு என் இரங்கலைத் தெரிவிக்கிறேன். விரைவாக வந்து குற்றவாளியைக் கைது செய்த பொலிசாரை பாராட்டுகிறேன் என்று தெரிவித்துள்ளார்.

பிரிட்டன் உள்துறை அமைச்சர் பிரித்தி படேல், ரீடிங் நகரில் நடந்த கத்திக்குத்துச் சம்பவம் எனக்குக் கவலையளிக்கிறது.

இந்தத் தாக்குதலில் பலியானவர்களுக்காக இரங்கல் தெரிவிக்கிறேன். இதுகுறித்து பொலிசார் விசாரணை நடத்தி வருகின்றனர். உரிய நேரத்தில் வந்து நடவடிக்கை எடுத்த பொலிசாருக்கு பாராட்டுகள் என கூறியுள்ளார்.