இலங்கையில் இருந்து மூன்று மாதக் குழந்தையுடன் மூன்று பேர் கொண்ட குடும்பத்தைச் சேர்ந்த 10 பேர் அகதிகளாக தனுஷ்கோடி சென்றடைந்துள்ளனர்.
இந்த சம்பவம் இன்று (05.11.2022) பதிவாகியுள்ளது.
இலங்கையில் நிலவும் கடும் பொருளாதார பின்னடைவு, உணவு மற்றும் அத்தியாவசியப் பொருட்களின் கடும் விலை உயர்வு, அத்தியாவசியப் பொருட்களின் தட்டுப்பாடு போன்ற காரணங்களால் இலங்கைத் தமிழர்கள் தனுஷ்கோடி கடல் வழியாக அகதிகளாக தமிழகம் வந்ததாகத் தெரிவிக்கப்படுகிறது.
தகவல் அறிந்த ராமேஸ்வரம் மரைன் போலீசார், இலங்கை தமிழர்களை மீட்டு ராமேஸ்வரம் கடல் காவல் நிலையத்துக்கு அழைத்து சென்று விசாரணை நடத்தினர்.
விசாரணையின் போது, இலங்கையில் நிலவும் கடும் பொருளாதார மந்தநிலையால் தமிழகத்திற்கு அகதிகளாக வந்ததாக இலங்கை தமிழர்கள் தெரிவித்தனர்.
பாதுகாப்பு அதிகாரிகளின் விசாரணையின் பின்னர் 10 பேரையும் மண்டபம் அகதிகள் முகாமில் ஒப்படைக்க நடவடிக்கை எடுக்கப்பட்டுள்ளது.
இலங்கையில் நிலவும் பொருளாதார நெருக்கடி காரணமாக கடந்த மார்ச் 22ஆம் தேதி முதல் இன்று வரை 198 இலங்கைத் தமிழர்கள் அகதிகளாக தமிழகம் சென்றுள்ளனர்.
